ស្វីស៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានអញ្ជើញដឹកនាំគណៈប្រតិភូជាន់ខ្ពស់កម្ពុជាចាកចេញពី Zurich ប្រទេសស្វីស មកកាន់កម្ពុជាវិញហើយ បន្ទាប់ពីបានបចូលរួមក្នុងវេទិកាសេដ្ឋកិច្ចពិភពលោក(WEF) និងកិច្ចប្រជុំនានា ដែលបានធ្វើឡើងនៅក្នុងប្រទេសស្វីស ចាប់ពីថ្ងៃទី២១ ដល់ថ្ងៃទី២៥ ខែឧសភា ឆ្នាំ២០២២។

យន្តហោះពិសេសរាជរដ្ឋាភិបាលបានហោះឡើងនៅម៉ោងប្រមាណ២រសៀលថ្ងៃទី២៥ ខែឧសភានេះ។

បើតាមការឱ្យដឹងពីសម្ដេចតេជោ បន្ទាប់ពីចេញពី Zurich ប្រទេសស្វីស យន្តហោះពិសេសនឹងចូលចតចាក់សាំងនៅទីក្រុងតេអេរ៉ង់ប្រទេសអេរ៉ងម្ដងមុនឡើងមកទីក្រុងញ៉ូដេលីប្រទេសឥណ្ឌានឹងចេញដំណើរមកដល់កម្ពុជានៅម៉ោងប្រមាណ៦ព្រឹកថ្ងៃព្រហស្បត្តិ៍ ទី២៦ ខែឧសភា។

សម្ដេចតេជោថា៖ «ដោយសារយើងមានភាពខុសគ្នាចំនួន៥ម៉ោង ខ្ញុំព្រះករុណាខ្ញុំនឹងចាកចេញពីទីក្រុងហ្ស៊ូរីចនៅម៉ោងប្រមាណ៩ព្រឹក ដែលត្រូវនឹងម៉ោងប្រមាណ២រសៀលម៉ោងនៅកម្ពុជា»។

មុននឹងចេញដំណើរ សម្ដេចតេជោបានផ្ញើសារសំឡេងពិសេសមួយផងដែរដល់ពលរដ្ឋខ្មែរដែលរស់សហភាពអឺរ៉ុបដែលបានមកទទួលស្វាគមន៍សម្ដេចកាលពីថ្ងៃសៅរ៍សប្ដាហ៍មុន។ សម្ដេចតេជោបានបង្ហាញអារម្មណ៍រីករាយ និងមោទនភាពចំពោះការគាំទ្ររបស់ប្រជាពលរដ្ឋនៅតំបន់នេះគាំទ្រដល់គណបក្សប្រជាជន និងរាជរដ្ឋាភិបាលកម្ពុជា។ សម្ដេចសង្ឃឹមថានឹងអាចវិលត្រលប់មកជួបពលរដ្ឋខ្មែររស់នៅសហភាពអឺរ៉ុបជាថ្មីម្ដងទៀតនៅក្នុងខែធ្នូ ឆ្នាំ២០២២ នៅទីក្រុងព្រុចសែល ប្រទេសប៊ែលហ្សិច ក្នុងឱកាសអបអរខួប៤៥ឆ្នាំនៃទំនាក់ទំនងអឺរ៉ុប-អាស៊ាន៕